Realak ezustekoa bilatuko du Bartzelonaren aurka

Erredakzioa

Azken eguneratzea: 2012/08/17 10:28 (UTC+2)

Txuri-urdinek historian soilik hiru garaipen lortu dituzte Camp Nou estadioan, baina Philippe Montanierren mutilak ligan aurreneko ezustekoa emateko ilusioarekin daude.

Griezmann eta Cuenca. Argazkia: EFE

Whatsapp
Whatsapp
telegram
twitt
Bidali
Esteka kopiatu

Albisteak (3)

Realak Bartzelonaren aurka Camp Nou estadioan egingo du ligako debuta. Gipuzkoako taldearentzat Bartzelonakoa Lehenengo Mailako estadio kaskarrena da, izan ere, historian soilik hiru garaipen lortu baitituzte txuri-urdinek. Hala ere, Philippe Montanierren aginduetara gauzak aldatu egin dira.

Donostiako taldearentzat Camp Nou estadioan jokatutako partidetako estatistikak oso kaskarrak dira. 65 norgehiagoka jokatu dituzte txuri-urdinek, eta soilik hiru garaipen eta zazpi berdinketa lortu dituzte. Honela, Kataluniako taldearen aurkako neurketen %86a porrotak izan dira.

Hala ere, iragan denboraldian, Realak Bartzelonaren aurka beste aurpegi bat erakutsi zuen. Montanierren mutilek arazo ugari sortu zizkioten Guardiolaren talde indartsuari, eta neurketak oso estuak izan ziren.

Anoetan jokatutako joaneko partidan, emaitza 2-2koa izan zen, eta Realak garaipenaren gola lortzeko abagune ugari izan zituen. Itzulerako neurketan Guardiolaren taldeak 2-1 gainditu zuen Reala, baina emaitzari eusteko Bartzelonak asko sufritu zuen.