Bushek eskua garbitu du haitiar bat agurtu ostean

Ameriketako Estatu Batuetako azken bi presidenteek Haitira egin duten azken bisita mundu osoan egin da ezaguna. Izan ere, George W. Bushek lurrikarak kaltetutako haitiarretako bat agurtu ostean bere eskua Clintonen alkandoran garbitu zuen.

Bideoa Youtuben eta nazioarteko hainbat komunikabideetako webguneetan ikusi daiteke. Irudien arabera, ez dago oso argi Bushek eskua garbitzen duen edo Clintoni keinu adiskidetsu bat eskaintzen dion.

NPR kate publiko estatubatuarrak adierazi du Bushen keinua oso "burutsua" dela, baina lurrikarak kaltetutakoen kanpamentu horretan "garbi mantentzea" zaila dela kontuan izanez gero, eskua garbitzea "ulergarria" dela onartu du.

Zorrotzagoak izan dira thinkprogress.org webgunekoak. Izan ere, George W. Bushek germenei dien nazka eta besteen arropan garbitzeko duen ohitura gogoratu dute.

Horrez gain, Barack Obamaren liburuetako batean jasotzen den gertakarietako bat gogoratu dute. Gaur egungo presidentea Illinoiseko senadorea zenean Bush presidentea Etxe Zurian bisitatu zuen eta eskua eman ostean, Bushek eskuetarako desinfektatzailea eskatu zuen.