Bitxikeriak -
Guiness Errekorra
Marka jarri nahi du Bastidak, mila pertsona mahatsa zapaltzen jarrita
Ekimena hilaren 25ean izango da, arratsaldeko zortzietan, Bakearen plazan, baina hainbat ekitaldi prestatu dituzte egun osorako.
Erredakzioa
Bastidak (Araba) munduko Guiness errekorra lortu nahi du. Horretarako, hilaren 25ean, mila pertsona inguru bildu nahi dituzte guztiak batera mahatsa zapaltzeko.
Bastidako Merkatari eta Ostalarien Elkarteak eta Udalak gaur esan dutenez, gaur egun indarrean dagoen Guiness errekorra gainditu nahi dute. Australian lortu zuten, eta 570 pertsona jarri zituzten mahatsa zapaltzen.
Ekimena arratsaldeko zortzietan izango da, Bakearen plazan, baina ekitaldi asko prestatu dituzte egun osorako: ardo-dastatzea, bazkari herrikoia, pilota-partidak eta txikientzako jokoak, besteak beste.
Erronkan Bastidako biztanleek eta kanpotarrek hartu ahalko dute parte, baita 8 urtetik gorako haurrek ere. Horretarako, bertako turismo bulegoan edo Merkatari eta Ostalarien Elkarteko edozein establezimendutan izena eman besterik ez da egin behar.