Krisi Ekonomikoa -
Bilbao Exhibition Centre
Jaurlaritzak eta Aldundiak 150 milioi jarri beharko dituzte BECen
Erakustazoka egiteko mailegu sindikatuen epea amaitzen da datorren urtean, eta diru kopuru hori berriro negoziatu edo ordaindu beharko dute, Kontu Auzitegiak jakitera eman duenez.
Erredakzioa
EAEko Kontu Auzitegiak uste du Eusko Jaularitzak eta Bizkaiko Aldundiak diru gehiago jarri beharko dutela Bilbao Exhibition Centre (BEC) Barakaldoko erakustazokaren bideragarritasuna bermatzeko, Euskadi Irratiak jakitera eman duenez.
Krisiaren ondorioz, BECen diru-sarrerek nabarmen egin dute behera azken urteotan. 2008tik 2011ra % 54 murriztu dira diru-sarrerak, neurri handi batean azoka kopurua murriztu egin delako. Horri maileguen karga gaineratu behar zaio. Hala, une honetan erakustazokaren altxortegia ia hutsik dagoela dio Kontu Auzitegiaren txostenak.
Hori gutxi ez, eta datorren urtean erakustazoka egiteko mailegu sindikatuen epea amaitzen dela gogoratzen du txostenak. 150 milioi euro dira guztira, eta Eusko Jaularitzak eta Bizkaiko Aldundiak berriro negoziatu edo ordaindu egin beharko dutela azpimarratzen du Kontu Auzitegiak, bi erakunde horiek eman baitzuten abala.
Bestalde, BECen aktibitate ekonomikoaren inguruan, Auzitegiak dio zenbait kontratutan urratu egin dela publizitate eta lehia printzipioa. Hala ere, aho batez onartutako txostenak dio arautegia zuzen bete dela orohar.
