Akordioak lortzeko borondatea adierazi dio Confebaskek Urkulluri

Confebask patronalak "herrialde akordioetan" parte hartzeko borondatea adierazi dio Iñigo Urkullu lehendakariari. Miguel Angel Lujua Confebaskeko presidentearen iritziz, balizko akordio horrek erraztu egingo luke krisi ekonomikoa bukatzea eta ekonomikoaren eta euskal enpresen lehiakortasuna hobetzea.

Ostiral honetan, Lehendakaritzan elkartu dira Confebaskeko presidentea eta Iñigo Urkullu. "Euskadik bizi duen egoera sozioekonomikoa larriaren jakitun gara, eta, orain arte bezala, gure ekarpena egiten ahalegindu gara", azaldu du patronalak ohar bidez.

Eusko Jaurlaritza egiten ari den "ahalegina" nabarmendu du patronalak, eta Gobernuarekin bat egiteko borondatea erakutsi du, harik eta horrek jarduera ekonomikoa, hazkundea eta enplegua bultzatuko duten neurri politikoak hartzen baditu.

Elkarrizketa, elkarlana eta konpromisoa oinarritzat hartuta, "ezinbestekoa da helburu partekatuak bilatzea, euskal gizarteak batasuna eta etorkizunarekiko itxaropena eta ilusioa berreskura ditzan. Helburua lortzeko, bere esku dagoen guztia egiteko prest agertu da Confebask.

Enpresen "ahalegina"

Euskal enpresak egiten ari diren 'ahalegina' aintzat hartzeko eskatu dio Lujuak Urkulluri.

Confebasken iritziz, enpresetan eta horietan egiten den lana izango da krisiari eta horren eraginari aurre egiteko bidea.