Ekonomia -
Gasolindegien greba
Zerbitzu minimoak murriztea proposatu diote sindikatuek Jaurlaritzari
Erregaien horniketan ez da arazorik izan zenbait gasolindegi mugagabeko greba deialdiaz kanpo daudelako (Eroskikoak, Lantegi Batuakekoak eta beste lan hitzarmen bat dutenak).
Erredakzioa
Bizkaiko gasolindegien greba deitu duten sindikatuek zerbitzu minimoak murrizteko proposamena egin diote Eusko Jaurlaritzari eta AEVECAR Estatuko patronalak Jaurlaritzarekin zuen bilera astelehenera atzeratzea kritikatu dute.
Enplegu Saileko arduradunak Bilbon bildu dira sindikatuekin eta Bizkaiko gasolindegietako bi patronalekin (AEVECAR eta Cebek) bildu dira gatazkan bitartekaritza lana egiteko. Grebak hilabete egingo du igandean.
ELA, LAB, CCOO, UGT eta USO sindikatuek komunikatua atera dute bileran zerbitzu minimoak murriztea proposatu dutela iragartzeko. Egun 12 gasolindegi zabalik daude zerbitzu minimoak betetzeko, baina, sindikatuen arabera, erregaien horniketan ez da arazorik izan zenbait gasolindegi mugagabeko greba deialdiaz kanpo daudelako (Eroskikoak, Lantegi Batuakekoak eta beste lan hitzarmen bat dutenak).
Jaurlaritzak proposamen formala egin izana ezeztatu du
Eusko Jaurlaritzako Enplegu sailak azaldu duenez, ez du grebaren inguruko ''proposamen formalik'' egingo AEVECAR Estatuko patronalarekin bilera egin arte.
Hala, ezeztatu egin du sindikatuei lan-hitzarmena "guztiz" blindatzearen eta Lan Erreforma "% 100ean" aplikatzearen bitarteko akordioa proposatu izana, sindikatuek beraiek iragarritakoaren kontra.
Cebek
Gasolindegi pribatu txikiak ordezkatzen dituen Cebek Bizkaiko patronalak, bestalde, egungo zerbitzu minimoak mantentzea eta gasolindegi txikiak piketeen jardunaren aurrean defendatzea eskatu du.
