Gipuzkoako zahar-etxeetako langileek greban jarraituko dute

Iñigo Zubeldia ELAko arduradunak jakinarazi duenez, Gipuzkoako zahar-etxeetako langileek protestak egiten jarraituko dute, enpresek Diputazioaren hitzarmen-proposamena sinatu arte. Sektore hori greba mugagabean dago maiatzaren 13tik aurrera.

Gipuzkoako zahar-etxeetako eta eguneko egoitzetako langileek manifestazioa egin dute gaur, Donostiako Boulevard Zumarditik hasita, murrizketen kontra eta sektorearen hitzarmen probintzialaren alde. Pankartan "Erresidentziak borrokan, erreformarik ez" irakur zitekeen.

Zubeldiak azaldu duenez, langileen % 82k akordioa sinatu dute euren enpresekin, baina mobilizazioak egiten jarraituko dute "zahar-etxe guztiek" hitzarmen-proposamena sinatu arte.

Horren harira, Zubeldiak enpresei behin-behineko hitzarmena "orain sinatzeko" eskatu die. Gainera, jakinarazi duenez, aste honetan bi zahar-etxe handik sinatu dute; ondorioz, bederatzi egoitza daude sinatzeko zain. Bestalde, sektorearen % 82 blindatuta eta lan gatazkatik kanpo dagoela azaldu du, baina "azkenak sinatu arte gatazkak jarraituko du".