Ekonomia -
Lan gatazka
ELAk lanaldia handitzeko dekretua baztertzeko eskatu dio Jaurlaritzari
EAEko gobernuaren dekretuak milaka lanpostu suntsitu dituela eta hartutako azken neurriek soldatak % 23 murriztu dituztela salatu du sindikatuak.
Erredakzioa
ELA sindikatuak "inposatu zuen lanaldia handitzeko dekretua" ahalik eta azkarren bertan behera uzteko eskatu dio Eusko Jaurlaritzari. Neurri horrek gutxienez 45 orduko lanaldiak eta milaka lanposturen suntsipena ekarri duela salatu du sindikatuak, eta 35 orduko lanaldien akordioa betetzeko eskatu du.
Ohar batean adierazi duenez, sektore publikoko zor komertziala kontrolatzeko Lege Organiko proiektuari gehitutako zuzenketak langile publikoen oinarrizko estatutuan aldaketak sartzen dituela esan du ELAk. Horren ondorioz, kontu pertsonaletarako urtean hiru egun izan ordez, lau izan beharko lituzkete funtzionarioek.
"Azken urteetan, zenbait instituziok abian jarri dituzten murrizketa politikek milaka lanpostu publiko suntsitu, lan eskubideak ezabatu, soldatak % 23 baino gehiago murriztu, lanaldia luzatu, baja gehigarriak eta egun libreak gutxitu eta LEP bidez langile publikoak kaleratzeko aukerak eskaini dituzte", gogorarazi du sindikatuak.
Zenbait instituziori "politika horiek errotik aldatu, zerbitzu publikoen alde egin eta azken urteetan murriztutako eskubideak itzuli" dezaten eskatu die ELAk.
Azkenik, "galdutako lanpostuak berreskuratzeko mobilizazioak" egiten jarraitzeko eskatu die sindikatuak langile publikoei, eta "kendutako lan baldintzen eta kalitatezko zerbitzu publiko unibertsalen alde" borroka egiteko deia egin diete.