Ekonomia -
Greziako hauteskundeak
Europako burtsek lasai hartu dute Syrizaren garaipena
Merkatu nagusiak zenbaki berdetan daude Greziako hauteskundeen ostean. Ibex 35ek % 0,21eko igoera du.
eitb.eus
Europako burtsek lasaitasunez eta hazkunde txikiekin hartu dute Greziako hauteskundeak Syriza alderdiak irabazi izana.
Horren ildotik, 11:30ean, Espainiako adierazle nagusiak, Ibex 35ek, % 0,21eko hazkundea izan du (10.603 punturaino), saio hasieran % 0,375eko galerak izan baditu ere.
Hazkunde handiena ondokoek izan dute: Sacyr (% 4,56), Abengoa (% 3,87) eta Gamesa (% 3,73). Bestalde, Repsolek (% -1,89), Indrak (% -0,79) eta Santanderrek (% -0,66) izan dituzte galera handienak.
Europako gainerako burtsetan, zenbaki berdeak zabaldu egin dira. Horren haritik, Parisek % 0,24 egin du gora, eta Frankfurtek, % 0,69. Milanek bakarrik egin du behera; % 0,34, hain zuzen ere.
Bereziki aipagarria da Atenasko burtsa. Izan ere, % 5eko galerekin hasi du saioa, baina Syrizak eta eskuineko nazionalistek Gobernu akordioa iragarri eta gero, leundu egin du jaitsiera, eta % 1 inguru ari da behera egiten.
Diru-merkatuan, euroa 1,11 dolarrean salerosi dute saio hasieran (maila baxuena, 2003ko apiriletik), baina 1,12 dolarrera igo da ondoren.
