Neinor berriak 1.000 milioi euro inbertituko ditu lurzorua erosteko

Lone Star inbertsio funtsak Kutxabanki erositako Neinor higiezinen enpresak 1.000 milioi euro inbertituko ditu 2015ean Espainiako Estatuan lurzorua erosteko eta etxebizitzen 10 promozio martxan jartzeko, Neinor Homes konpainia berriak ohar batean jakinarazi duenez.

Kutxabankek abenduan iragarri zuen salmenta, baina ostegun honetan gauzatu da, operazioak Balore Merkatuaren Batzorde Nazionalaren eta Ekonomia Ministerioaren baimenak jasota.

Konpainiak iragarri duenez, urtean 3.000 etxebizitza eraiki nahi ditu, lanpostu zuzenak eta zeharkakoak sortuz, eta higiezinen sektorean "erreferentziazko" enpresa bihurtu nahi du.

1.000 milioi euroko aktiboak eta 5.000 etxebizitza egiteko lurzorua erosita du konpainiak. Aurrerantzean, Euskal Autonomia Erkidegoan (EAE), Madrilen, Katalunian, Andaluzian eta Balear Uharteetan eraikiko ditu etxeak, hau da, eskari handiena baina stock txikiena duten erkidegoetan.

Horrez gain, beste 1.000 milioi euro bideratuko ditu aurten lurzoru gehiago erosteko eta promozio gehiago egiteko.

Madrilen eta Bartzelonan egingo dituen bi promozioetarako finantzazioa Kutxabankek eta Santander Bankuak eman diote. Neinorren aburuz, "horrek agerian utzi du Espainiako higiezinen sektorea biziberritzen ari dela eta finantza erakundeak proiektu berri honetan konfiantza dutela".

Konpainia berriak bere egin ditu euskal taldearen langileak, guztira 127 profesional dira, Neinor, Inverlur, CajaSur Inmobiliaria eta Valle Romano sozietateetakoak.