'Konpromisorik gabe, elkarrizketa soziala bertan behera geratuko da'

Unai Sordo CCOO-Euskadiko idazkari nagusiaren aburuz, baliteke CCOOk elkarrizketa soziala "bertan behera uztea", baldin eta Eusko Jaurlaritzak "aurrekontuen gaineko konpromiso zehatzak" hartzen ez baditu.

Europa Pressi eskainitako elkarrizketa batean Sordok azaldu duenez, euskal patronalak "epe motzera" aritzen ari dira, eta hori hitzarmen kolektiboa "trabatzen" ari da. Gainera, "korporatibismo kontu batengatik" hitzarmen kolektiboa "pribatizatu nahi izatea" leporatu dio ELAri.

Buruzagi sindikalaren irudiko, Eusko Jaurlaritzak lan-harremanak berriro bideratu beharko lituzke, eta ez "ezinezko eskema bati eutsi, ELAk eta LABek ez baitute parte hartuko Euskadiko lan-harremanen normalizazioan". "Haientzako, horiei legitimitatea kentzeak status quori ere zilegitasuna kentzea dakar", azpimarratu du.

"Jaurlaritzak ezin dio horri eutsi, egin beharreko gauzak egin behar ditu, eta eztabaidarako gune eskasak ahultzeari utzi behar dio", nabarmendu du. Horren harira Sordok kritikatu duenez, Jaurlaritzak oraindik ez ditu garatu duela hilabete batzuk mahai sozialean onartutako neurriak, esaterako, errelebo kontratuak sustatzeko neurriak.

Sordok "pultsu falta" egotzi dio Jaurlaritzari, eta "bizkor aritu" behar dela uste du, enplegua suspertzeko neurriak ezar ditzan, batez ere, "kalitatezko enplegua lor dezagun". "Ez da onargarria mahai sozialean adostutako neurriak oraindik ezarri ez izana", deitoratu du. CCOO-Euskadiko buruzagiaren irudiko, "mugimendu gutxi" ikusten du auzi horretan, eta Ogasun Sailak, berriz, "kontrol sakona" egiten die enplegurako bideratutako bitartekoei.