Aldecoa kaleratu du PPk, 2015ean soilik 101.000 euro desagertu ostean

Alderdi Popularrak Arturo Aldekoa Bizkaiko gerentea kaleratu du, urte batean kutxatik justifikatu gabeko 101.000 euro desagertu egin zirela konturatu eta gero. Gaur egun, talde politikoak 100 euro eta 230.000 euroko zorra du bankuan.

Alfonso Alonso Euskadiko PPko presidenteak gaur, Gasteizen, prentsaurrekoan jakinarazi duenez, atzo esan zioten Aldecoari PPtik kaleratu egin dutela, 2015ean Bizkaiko taldearen kontuetan egindako auditorian atzemandako “ustezko irregulartasunak” direla eta.

Auditoreak aurreko urteetako diru mugimenduak aztertzen ari dira orain, eta kutxan zeuden 127.000 euro horietatik bakarrik justifikatu ahal izan dituzte 26.000 euro; gainerako 101.000 euro horiek desagertu egin dira, froga dokumentalak desagertu egin direlako edo iruzurrezko fakturak aurkeztu direlako.

Hori horrela, bidegabeko jabetzea, dokumentu faltsukeria eta kudeaketa desleial delituak egotzi ahal dizkiote Aldecoari; hori dela eta, aurreko urteetako auditorien emaitzen arabera, PPk Aldecoaren eta Gonzalo Pontesen aurkako legezko akzioak hartzeko eskubidea gordeko duela esan du Alonsok.