Ekonomia -
Iruñea epaitegia
TRWko batzordearen eta zuzendaritzaren desadostasunak, agerian
Langileek elkarretaratzea egin dute epaitegietako egoitzaren aurrean. Langile batzordea izan zen auzitara jo zuena.
eitb.eus
Sindikatuek eta zuzendaritzak TRWren Landabengo lantegian 123 langile kaleratzeko txostenaren inguruan dituzten desadostasunak agerian geratu dira gaurko auzi-saioan.
Justizia jauregiaren parean elkarretaratzea egin dute TRWko langileek saioaren aurretik, eta langile batzordeko sindikatuetako abokatuek (CCOO, UGT, LAB, ELA eta CGT) txostena atzera botatzeko eskatu dute, enpresak etekinak dituenez, "arrazoi ekonomikorik ez" dagoela iritzita.
Gainera, enpresak "ezusteko" kaleratze kolektiboa eta lan-hitzarmenaren negoziazioa aldi berean aurkeztu zituela salatu dute, eta hori "presio" handia izan zela.
Era berean, 123 langile kaleratzeko asmoa hasiera-hasieratik zutela eta negoziazioan enpresak ez zuela asmo onik izan azpimarratu dute.
Bestalde, enpresak, txostena aurkeztu aurretik, "stocka" pilatu zuela salatu dute, balizko greba bati aurre egiteko.
Sindikatuek "askatasun sindikalerako eskubidea urratu" zela kritikatu dute, sindikatuekin hitz egin gabe txostena aurrera ateratzen saiatu zirelako; eta TRWk etekinak ematen dituela berretsi dute.
"Hemen ez da negoziatzeko borondaterik izan, irtenbide bakarra zegoen. 123 kaleratzeen kopurua ez da negoziazioaren emaitza, eta ezin da onartu", adierazi dute.
TRWren abokatuaren bertsioa oso bestelakoa izan da, eta harrituta geratu da "kaleratze kolektiboa ezustean" hartu zutelako, "ikusten zelako", azken bost urteetan 55 milioi euroko galerak medio.
Lan-hitzarmenaren eta kaleratzeen negoziazioak aldi berean egitea legezkoa dela defendatu du, eta ukatu egin du "stock gehigarria" pilatu zutela eta negoziatzeari uko egin ziotela.
Zuzendaritzaren abokatuak ohartarazi du prentsan ere azaldu zela langileek 123 langileren kaleratzea onartu izana, gero sindikatuek ukatu eta onarpena lan-hitzarmen berriaren arabera izango zela adierazi bazuten ere.
Hala, sindikatuen sinadurarik gabe, ez ziren akordiora iritsi eta enpresak 123 kaleratze proposatu zituen.
TRWren abokatuak, azkenik, azpimarratu du Iruñeko lantegia ez dagoela zaharkituta, "ekoizten dituen produktuak" baizik.
