BBKk 60,7 milioi irabazi ditu urteko lehen hiruhilekoan

Bilbao Bizkaia Kutxak (BBK) 60,7 milioi euroko irabaziak izan ditu 2010. urteko lehen hiruhilekoan, iazko tarte berean baino %0,2 gehiago. BBKko arduradunen arabera, hazkunde hau negozio bolumenak izan duen bilakaera onaren eraginez lortu da, %7,5 hazi baita, bai eta administrazioko gastuei eusteko ezarri diren politiken emaitzen ondorioz ere.

BBK-ko iturriek gaur jakinarazi dutenez, interesen %23 jaitsi da urteko lehen hiruhilekoan, 2009ko interes tipoen gainbeherarengatik, eta jaitsiera hauek BBKren hipoteketan isla zuzena izaten baitute, gutxieneko interesik gabeko hipotekak dira-eta. Marjin gordina, bestetik, %3 txikitu da.

Ustiapen emaitza %1 hazi da, gastuei eusteko ezarri diren politikek bultzatuta. Horrela, administrazioko gastuak %2,9 murriztu dira, eta BBKren eraginkortasunak, gastuak eta marjina alderatzen dituena, iazkoaren aldean hobetzen jarraitzen du eta alorreko onenetarikoa da, %34,69ko indizearekin.

Berankortasun maila, berriro, aurrezki kutxa eta banku guztien arteko onenetakoa da, %2,60koa, hain zuzen ere. Estaldura indizeari dagokionez, %99,22ra iristen da.

2010eko lehen hiruhilekoan bereziki azpimarragarria izan da negozio bolumenak izan duen hazkundea, %7,5 igo baita, xehekako sareak izan duen bilakaera onaren bitartez, hau %5,4 hazi da-eta.

Administraturiko baliabideek "erritmo onean" jarraitu dute hazten (%12,7), eta bilakaera horretan "erabakiorra" izan da Finecok BBKren Banka Pribatuarekin behin betirako bat egin izana, bai eta zedula hipotekarioak merkaturatu izana ere, 2009ko azken hiruhilekoan.

Halaber, deigarria da bistako gordailuak %13,3 hazi izana, eta epe laburreko saldoak epe luzera aldatu izana. Hazkunde hau bereziki azpimarragarria da "pasiboko gerra" zabalik den testuinguru honatan, are gehiago BBK ez baita norgehiagoka horretan sartu.