CCOO eta UGT: 'Jaurlaritzaren murrizketak ilegalak dira'

Eusko Jaurlaritzak onartu nahi dituen herstura neurriak "legez kontrakoak" direla uste dute UGT eta CCOO sindikatuek, enpresa publikoen hitzarmenak urratzen dituztelako, izan ere, soldaten murrizketa langile guztien gainean aplikatu nahi dute. Horregatik, legea onartzen baldin badute helegite juridikoak aurkezteko mehatxu egin dute sindikatuek.

Bilbon egindako prentsaurrekoan, EAEko enpresa publikoetako 50.000 langileak ekainaren 8ko greban parte hartzera deitu dituzte gaur Unai Sordo eta Damaso Casado CCOOko eta UGTko idazkari nagusiek, hurrenez hurren.

Euren iritziz, Eusko Jaurlaritzaren herstura legea Gobernu zentralarena baino potoloagoa da, soldaten murrizketa enpresa publikoetako langileei aplikatu nahi dietelako. Gobernu zentralaren dekretuak, ostera, ez die langile horiei eragiten.

Eusko Legebiltzarrak Eusko Jaurlaritzaren legea horrela onartzen baldin badu "legez kontrakoa" izango litzateke, Casadoren hitzetan. "Hitzarmen kolektiboak urratzeko" norabidean baldin badoaz sindikatuek "beharrezko errekurtso juridiko guztiak" planteatuko dituztela ohartarazi du.

Bestalde, CCOO sindikatua "aspektu juridikoa" aztertzen ari dela baieztatu du Sordok eta Eusko Jaurlaritzaren neurriak "erabat" arbuiatu ditu.

Greba orokorraren mehatxua

Bestalde, Jose Luis Rodriguez Zapatero Gobernuko presidenteak "langileen eskubideak murrizten" dituen lan-erreforma bat onartzen baldin badu Estatuan greba orokorraren deialdia egingo dutela errepikatu dute Euskadiko UGT eta CCOO sindikatuek.

Lan-erreforma eztabaidatzen ari den elkarrizketa sozialeko mahaiaz mintzatu dira Casado eta Sordo. Elkarrizketa "amaitu ez" dela gogorarazi dute, izan ere, "ekainaren 9an beste bilera bat dago eta azken unera arte akordioa lortzeko aukera dagoela uste dugu".