EB Europako banketxe guztien kaudimena argitaratzearen alde agertu da

27 bazkideek Europako banketxe guztien kaudimena erakusten duten proben emaitzen berri ematea adostu dutela jakinarazi du Herman Van Rompuy Europar Batasuneko presidenteak. Neurri horrekin, Europako sistema finantzarioaren egoeraren inguruko ziurgabetasuna uxatu nahi dute.

"Banketxe sistema sendoa eta onbideratua gure lehentasuna da" adierazi du Van Rompuyk gaurko goi-bilera bukatu osteko prentsaurrekoan.

EBeko buruak nabarmendu duenez, "beranduenez, uztailaren bigarren hamabostaldirako" eskatu dizkiete erakunde finantzarioei kaudimen frogen berri ematea.

EBeko estatuburuek horrela, Zapateroren proposamena babestu dute. Espainiako Gobernuko presidenteak banketxeen kaudimena erakusten duten probak argitara ateratzearen alde agertu da bere agerraldian, eta azterketa horiek egiten direla bermatzea eta horientzako aldizkakotasuna zehaztea proposatu du..

Krisiaren sorburua sistema finantzarioa baldin bada, gardentasuna areagotu eta merkatuen egoera baloratzeko datu objektiboak izan behar direla iritzi du Zapaterok eta espekulazioei aurre egiteko neurririk onenak, gardentasuna eta zuhurtasuna direla adierazi du.

EBeko Ministroen Kontseiluko Lehendakaritzaren ardura izan du Espainiak 2010eko lehen seihilabetekoan eta gaurkoa izan da Zapaterok gidatu duen azken goi-bilera.

27ek Espainiarengan "konfiantza osoa" dutela baieztatu du Sarkozyk

Espainiarentzako erreskate plana martxa jartzearen beharraren inguruko galderari, ezezko borobila eman dio Nicolas Sarkozy Frantziako presidenteak.

Europar Batasunaren azterketa "Europako Banku Zentralaren eta Batzordearenarekin" bat datorrela azpimarratu ondoren, EBk Espainiarengan "konfiantza osoa" duela baieztatu du Sarkozyk