Zapatero Shanghain da Espainiako ekonomia sustatzeko babes bila

Jose Luis Rodriguez Zapatero Espainiako Gobernuko presidentea Shanghaira iritsi berri da Erakusketa Unibertsalearen baitan Espainiaren Egunean parte hartzeko, ekonomia sustatzeko babesak bilatzea helburu.

Gobernuak jakinarazi duenez, munduko potentzia ekonomiko handienetakoak dira Japonia eta Txina eta horien babesa lortzeko egingo du Zapaterok bilera-sorta. Gobernuburuarekin batera Miguel Angel Moratinos Atzerri Gaietarako ministroa, Miguel Sebastian Industria ministroa eta Cristina Garmendia Zientzia eta Teknologia ministroa joan dira.

Espainiaren eguna

Erakusketa Unibertsala Espainiaren Eguna ospatzen ari da gaur, eta kirol alorrean Espainiak izan dituen arrakastaren jakitun, Munduko Futbol Txapelketako koparekin iritsi da Zapatero.

Espainiako, Txinako, Madrilgo, Bartzelonako eta Bilboko pabilioiak bisitatuko ditu, eta gero Espainiak Txinan duen Merkataritza eta Industria Ganbera ofizialaren 10. urteurrenaren ospakizunean parte hartuko du.

Azken ekitaldi horretan Txinan negozioa duten enpresari espainiarrekin eta Gerardo Diaz Ferran CEOEren presidentearekin elkartuko da Gobernuko presidentea.

Bilera, Txinako lehen ministroarekin

Asteartean, Zapatero presidentea Pekinera joango da Wen Jiabao Txinako lehen ministroarekin bilera egitera eta tour operadoreetako ordezkariekin bilduko da gero, izan ere, munduko 5. turista esportatzaile handiena da herrialde asiarra.

Era berean, ekonomia alorreko hedabideekin ere egingo du topaketa bat Espainiako erreforma ekonomikoak eta etorkizunerako aurreikuspenak azaltzeko.

Helburu berarekin, bisita ofiziala egingo du lehenengo aldiz Japoniara, eta kazetariekin eta enpresariekin hitz egin eta gero, Naoto Kan lehen ministroarekin eta Akihito enperadorearekin egingo du bilera.