Ekonomia -
Lan-istripua, Azpeitian
Lankide baten heriotza salatu dute Glual Energyko langileek
ELAk, LABek, ESKk, STEILASek, EHNEk eta HIRUk osatutako gehiengo sindikalak deitu du protesta. EAEn, 2017an, 42 langile hil dira, hainbat lan-istriputan.
Erredakzioa
Azpeitiko Glual Energy enpresako langileek langile baten heriotza salatu dute asteartean, lantegiaren aurrean egindako elkarretaratze baten bidez. Aurreko ostiralean, hilaren 25ean, langile bat hil zen bertan, lan-istripuan. ELAk, LABek, ESKk, STEILASek, EHNEk eta HIRUk osatutako gehiengo sindikalak deitu du protesta, eta dozenaka lagunek hartu dute parte horretan.
2017an, orain arte, 42 lagun hil dira EAEn hainbat lan-istriputan. Horietako bi Azpeitian bertan hil dira azken hilabeteotan.
Sindikatuek salatu dutenez, lan-prekarietateak eragin ditu heriotza horiek, eta berriro galdegin dute lan-istripu gehiagorik ez izatea.
Biktima, 50 urtekoa bera, aurreko ostiral eguerdian topatu zuten lankideek, hilda zegoela.
