AEBei auzipetzeak ekiditen lagundu izana ukatu du Fiskaltzak

Ministerio Publikoak edo Auzitegi Nagusiko Fiskaltzak AEBei militarren auzipetzeak Espainian ekiditen lagundu izana ukatu du gaur Candido Conde-Pumpido Estatuko fiskal nagusiak.

Espainiako epaileek eta fiskalek "independentzia osoz jarduten direla, ez dutela inoren eraginik onartzen eta ez dutela inolako presio edo esku-hartzerik onartzen" esan du fiskal nagusiak.

Wikileaksen agirien filtrazioei buruz eta El Paisek argitaratutako datuei buruz hitz egin du Conde-Pumpidok. Dokumentu horietan, antza, Fiskaltzak AEBetako enbaxadari Jose Couso Telecincoko kameralariaren auzian jarraitu beharreko estrategia juridikoari buruzko gomendioak eman zizkion.

"Mesedez, epaileen eta fiskalen irizpidea errespetatu dezagun, eta ez ditzagun egiaztatu gabeko jokaerei buruzko harreman diplomatikoei jaramon egin", esan du.

Ildo horretan, fiskal orokorra arduratuta agertu da; izan ere, "iritzi publikoak justiziaren funtzionamenduari buruzko uste faltsua eskuratu dezake, egiaztatu gabeko ezkutuko dokumentu batzuetatik ateratako informazioaren ondorioz".

"Adeitasun diplomatikoa erabat bateragarria da epaileek eta fiskalek jarduteko duten irizpide juridikoarekin", adierazi du. Argitaratutako dokumentuen fidagarritasunaren harira, Conde-Pumpidok esan du ez duela eztabaida piztuko eta dokumentu horiek osorik irakurtzeko gomendatu du.

AEBei auzipetzeak ekiditen laguntzea ukatzeaz gain, fiskal nagusiak "bere jarrerari buruzko informazioa ematen duela eta hori iritzi publikoari eta hedabideei helarazten dien informazioarekin bat datorrela" esan du.