Gasteizko Udala azterketen filtrazio posible bat ikertzen ari da

Mantentzeko ofizialen lanpostuak banatzeko azterketako proba batean filtrazio posible bat argitzeko barne ikerketa abiatu du dagoeneko Gasteizko Udalak, eta “aurrerapauso esanguratsuak” eman dira jadanik.

Aurrerapauso horiek “egiaztatzen” ari direla azaldu dute Udal-gobernuko iturriek. Gertatutakoa datozen egunetan argitu ahal izatea espero dute, eta beharrezkoa balitz dagozkion neurriak hartu.

Norbaitek mantentzeko ofizialen lanpostuak banatzeko azterketaren edukia Gasteizko egoitzaren postontzian utzi zuela publikoki salatu du ESK sindikatuak. Gainera, proba egiteko bezperan notario-akta erregistratu zuen sindikatuak. Oposizioko talde guztiek azalpenak eskatu dizkiote EAJ-PSE Udal-gobernuari.

ESKk prentsa-oharra argitaratu eta handik 24 ordura, eta inork salaketarik aurkeztu ez duenez ikerketa abiatu dute, udal-gobernuko iturriek azaldu dutenez. Sindikatuarekin ostiral honetan bilduko dira, komunikabideetan zabaldu diren xehetasunen berri emateko.

Informazio eta dokumentazio guztia aztertu ondoren, “irregulartasun zantzuren” bat antzematen baldin badute “azkenera arte heltzeko” asmoa errepikatu du Gorka Urtaranen Gobernuak, “eta beharrezkoa balitz neurriak hartu”.

Oposizioko taldeei “erantzukizuna” eskatu diete iturriek, “oportunismoan” ez erortzeko; “horrek erakundearen beraren eta funtzionarioen sinesgarritasunari mesederik egingo ez dielako”.