LABek eta EH Bilduk lan harremanen euskal eredua babestu dute

LABek eta EH Bilduk bilera izan dute ostiral honetan, eta sindikatuak "erabakitzeko gaitasun osoa izateko" beharra azpimarratu du "lan harremanen euskal eredua artikulatzeko, babes sozialerako eta gune ekonomiko propioa izateko".

LABen ordezkaritza bat, Garbiñe Aranburu sindikatuko idazkari nagusia buru duela, Maddalen Iriarte, Pello Urizar eta Unai Urruzuno EH Bilduko legebiltzarkideekin bildu da ostiral honetan, Donostian, sindikatuak hasitako bileren baitan, Legebiltzarrean aztertzen ari diren estatus politiko berria dela eta.

Bileraren amaieran, LABek ohar batean azaldu duenez, bilera giro "adeitsuan" egin dute, eta "egungo Autonomia Estatutuak dituen egitura faltak gainditzeko beharrari" buruz hitz egin dute, baita subiranotasunaren beharraz ere, Euskal Herriarentzat berebiziko garrantzia duten hainbat gairen inguruan erabaki ahal izateko".

Araba, Bizkaia eta Gipuzkoako herritarrek lan harremanetarako eta babes sozialerako euskal esparrua eta esparru sozioekonomiko propio bat artikulatzeko erabaki ahalmen osoa izatearen beharra azpimarratu du LABek. "Herri bezala aurrera egiteko eta langileen arazoei irtenbidea jartzeko erabakitzeko gaitasuna", gaineratu du sindikatuak. "Bi aldeak gai horretan bat" etorri direla esan du.

Bestalde, EH Bilduk prentsa-ohar bat bidali du, eta bilera "emankorra" izan dela adierazi du, eragileek eta herritarrek estatus politiko berriari ekarpenak egitea garrantzitsua dela uste izanda.

Alderdiak bere egin du LABek lan harremanen euskal eredua artikulatzeari buruz egindako aldarrikapena, honela bakarrik lortuko delako Euskadin erabakitzea lan harremanei buruzko guztia, "kanpoko esku-sartzerik gabe".

LABek egiten duen bigarren bilera da. Bilera-sorta asteazkenean hasi zuen, Bilbon, Podemosekin.