Hiru langile zauritu dira Bilboko metroaren eskailera batean izandako sutean

Hiru pertsona kea arnastuta zauritu dira sute batean, Indautxuko metro-geltokian, Bilbon. Geltokiaren eskailera mekanikoetan mantentze-lanak egiten ari ziren.

Eusko Jaurlaritzako Segurtasun Sailak jakitera eman duenez, sutea 03:34 aldera gertatu da, bi behargin Urkixo zumarkaleako sarreraren eskailera mekanikoetan lanean ari zirenean. Suak ke-mordoa sortu du.

Anbulantziak eta suhiltzaileak bertaratu dira. Suhiltzaileek sua itzali dute, eta haizagailuak erabili dituzte kea desagertzeko.

Geltokian zegoen metroko langile batek arnasa hartzeko arazoak izan ditu, eta osasun-langileek bertan artatu dute. Era berean, eskaileratan lanean ari ziren bi beharginek ere oxigenoa behar izan dute, eta osasun zentro batera eraman behar izan dituzte.