Ekonomia -

Finantza produktu berria

Nafarroak 'bonu berde eta sozialak' jaulkiko ditu aurten, lehen aldiz

50 milioi euroko balioarekin merkaturatuko dituzte. Ogasun kontseilariaren hitzetan, arlo horretan 'lehen tokietan' kokatu da Nafarroa, bonuak ateratzen dituen hirugarren erkidegoa baita.

Gaurko gobernu bileran onartu dute bonuen jaulkipena. Argazkia: Nafarroako Gobernua
Nafarroako Gobernuaren gaurko bilera.
Gaurko gobernu bileran onartu dute bonuen jaulkipena. Argazkia: Nafarroako Gobernua

Agentziak | Erredakzioa

Whatsapp Facebook Twitter Telegram Email

Nafarroako Gobernuak "bonu berde eta sozialak" jaulkiko ditu aurten, lehen aldiz eta 50 milioi euroko balioarekin. Helburua gardentasuna sustatzea eta garapen jasangarria finantzatzea da, Mikel Aranburu Foru Gobernuko Ogasun eta Finantza Politiken kontseilariak nabarmendu duenez.

Jaulkipena Bonu Jasangarrien Merkatuaren bidez egingo dute. Jasangarritasunarekin lotutako proiektu eta ekintzak finantzatzeko erabiliko dituzte. Lehen ordainketa apirilerako egitea aurreikusi dute.

Aurretik Eusko Jaurlaritzak eta Madrilgo Gobernuak egin dituzte tankerako jaulkipenak. Aranbururen hitzetan, gaur gobernu bileran adostutako jaulkipen horrek arlo horretan "lehen tokietan" jarri du Nafarroa, Estatu osoan hori egiten duen hirugarren erkidegoa baita.

Tankerako proiektu bat abiatzen duen lehen erkidego txikia da, gainera, Nafarroa.

Proiektu berde eta sozialak finantzatzeko erabiliko dituzte bonuak. Lehenengoei dagokienez, honako helburuak izango dituzte kontuan: jasangarritasun energetikoa, energia berriztagarriak, kutsadurari aurrea hartzea eta kontrolatzea, uraren erabilera jasangarria edota hondakin-uren erabilera eta eraikin ekologikoak.

Bonu sozialen kasuan, honako xedeak dituzten proiektuetara egongo dira zuzenduta: etxebizitza irisgarriak, enpresa ertain eta txikietan enplegua sortzea, hezkuntza maila txikia duten pertsonei laguntzea, aurrerapen sozio-ekonomikoa, oinarrizko zerbitzuetara sarbidea erraztea, bereziki ahulak diren herritarrei laguntzea edota elikadura-segurtasuna.

Hau zure interesekoa bada, baliteke beste gai hauek ere izatea
Nafarroa Ekonomia Eguneko albisteak Albisteak Burtsa Nafarroako Gobernua