Hipotekak ordaindu ezinik dabiltzan familiak babestu nahi ditu Mendiak

Krisia dela-eta hipotekak ordaindu ezinik dabiltzan familien interesak babesteko erabakia hartu duten epaileen "ausardia" goraipatu du Idoia Mendia Justizia sailburuak eta esparru horretan herritarrak babestearen alde agertu da.

PSEk antolatutako jardunaldiak itxi ditu gaur Mendiak Bilbon, ''Zuzenbidearen erronkak krisi ekonomikoak familiengan duen ondorioen aurrean'' izenburupean.

Kale egin duen hipoteka-kreditu baten atzean langabezian diren familiak, gizon eta emakumeak, daudela azaldu du Eusko Jaurlaritzako bozeramaileak hitza hartu duenean. Langabezian dauden familiek ezin dute hipoteka bati aurre egin eta etxebizitzarik gabe geratzeko aukera horrek gatazka sortzen du.

Arazo garrantzitsua

"Arazo garrantzitsua" dela azaldu du Mendiak, lanpostuen galerarekin batera, "pertsonak muga-egoera batean utz dezakeelako".

Bozeramailearen ahotan, "gatazkaren arazoa bideratzen laguntzen dute" zenbait epaileren jokabideak, "baina ez dute egoera erabat konpontzen".

Zenbait ebazpen judizial "ausart" aipatu ditu sailburuak. Erabaki horien bidez, hipotekatutako ondasuna entregatuta zorra kitatu dela uste dute epaile horiek, azaldu du Mendiak.