Gobernuak baino langabezia gutxiago iragarri du Espainian Diru Funtsak

Espainiako barne produktu gordinak aurten % 0,8 egingo du gora, eta 2012an % 1,6 haziko da, Nazioarteko Diru Funtsaren arabera. Espainiako ekonomiari buruz aurretik egindako iragarpenak bi hamarrenetan eta hamarren batean hobetu ditu, hurrenez hurren; hala ere, langabezia tasa altuari dagozkion datuak ez dituzte aldatu: 2011 honetan % 19,4koa, eta 2012an % 18,2koa izango dela aurreikusi dute.

Dominique Strauss-Kahnek zuzentzen duen erakundeak Espainiako Gobernuak aurreikusitakoa baino iragarpen txarragoa aurkeztu du ekonomia hazkundeari dagokionez. Nazioarteko Diru Funtsaren arabera, aurten Espainiako BPGk % 0,8 egingo du gora, eta 2012an % 1,6.

Bestalde, Nazioarteko Diru Funtsaren arabera, inflazioa % 2,6koa izango da aurten Espainian, eta 2012an % 1,5era jaitsiko da.

Iragarpen horiek betez gero, Eurogunean, Espainia Irlanda (% 0,5), Portugal (- % 1,5) eta Grezia (- % 3) baino gehiago haziko da, baina datorren urtean Italia (% 1,3), Herbehereak (% 1,5), Portugal eta Grezia baino gehiago haziko da.

Nazioarteko Diru Funtsaren iragarpenen arabera, Euroguneko ekonomia aurten % 1,6 haziko da, eta 2012an % 1,8; kasu bietan, aurreko iragarpenak esaten zuena baino hamarren bat gehiago. Langabezia-tasari dagokionez, 2011n % 9,9koa izango da eta 2012an % 9,6koa.

Nazioarte mailan

Nazioarteko ekonomiaren egoerari dagokionez, aurreikusitakoa betetzen eta suspertzen ari da; gainera, atzeraldian jausteko beldurra urrundu dela esan dute; aurten, nazioarteko BPGk % 4,4 egingo du gora, eta 2012an % 4,5.

Dena den, suspertze horrek "desorekatua" izaten jarraituko duela adierazi dute; izan ere, ekonomia garatu gehienen BPG beren ahalmenen azpitik dago, eta hazkunde maila txiki horrek langabezia handia ekarriko du "urte askotarako".