Erne: 'Baliteke Ertzaintzaren haserreak M-22an eragina izatea'

Roberto Seijo Erne sindikatuko bozeramailearen hitzetan, baliteke Ertzaintzaren "haserreak" hauteskunde egunean ondorioak uztea eta bajak edo lanuzteak izatea; izan ere, Ertzaintzak arazoak ditu Herrizaingo Sailarekin lan-baldintzen hobekuntza negoziatzeko. Seijoren esanetan, erantzukizuna Eusko Jaurlaritzarena izango da.

Erne, ESAN, Sipe eta Euspel sindikatuek Eusko Jaurlaritzaren Lehendakaritzaren aurrean elkarretaratzea egin ostean egin ditu adierazpen horiek Seijok.

Aurretik Idoia Mendia Eusko Jaurlaritzako bozeramaileak esan du hauteskunde eguna bukatu arte bertan behera gelditu direla bilerak Ertzaintzarekin, "xantaiak" saihesteko.

Mendiaren hitzetan, hauteskundeen ostean giroa "lasaiagoa" izango da. Bestalde, hauteskunde eguna "normaltasunez" garatzeko baliabide guztiak erabiliko dituztela esan du Mendiak.

Erne, ESAN, Sipe eta Euspel sindikatuek ez dute protesta ekitaldirik aurreikusi hauteskunde egunerako, baina bihar bilera egingo dute lau sindikatuek, eta baliteke Ertzaintzaren haserreak eragina izatea igandean. Ertzaintza lan-hitzarmenik eta bigarren jarduera arautzeko akordiorik gabe dago.