Ekonomia -
LAN-ISTRIPUA
24 orduko lanuztea abiatu dute Viscofan enpresan, lankide baten heriotza salatzeko
45 urteko behargin bat hil zen larunbat honetan Kasedako Viscofan enpresan gertatu zen lan-istripuan, eta 54 urteko lankide bat larri zauritu zen istripu berean.
AGENTZIAK | ERREDAKZIOA
Nafarroan, Kasedako Viscofan enpresan, 24 orduko lanuztea deitu dute astelehen honetan, larunbatean gertatutako lan-istripuan langile bat hil eta beste bat oso larri zauritu zela salatzeko.
Geldialdia asteleheneko (irailak 16) 06:00etatik astearteko (irailak 17) 06:00etara egingo dute.
Era berean, enpresako atarian elkarretaratzea egingo dute 13:00etik 15:00etara.
Istripuaren ikerketa, irekita
Nafarroako Gobernuak larunbatean jakitera eman zuenez, gauerdi aldera, hidrogeno sulfuroa zuten edukiontzi batzuetara erori ziren bi behargin eta gas toxikoa arnastu ondoren hil egin zen horietako bat, 45 urtekoa. Bestea, 54koa, Nafarroako Ospitalera eraman zuten, oso larri.
Larrialdietarako zerbitzuak iritsi aurretik, enpresan zeuden beste behargin batzuek artatu zituzten bi langileok, eta suspertzen saiatu ziren arren, bat tokian bertan hil zen.
LAB, CCOO eta UGT sindikatuek elkartasuna adierazi zieten biktimen lankide, lagun eta familiei. Gertatutakoa argitzeko ikerketa sakona eta laneko ezbeharrei aurre egiteko egitasmoa martxan jartzea eskatu zuten, eta Nafarroan lan-istripuek gora egin dutela salatu zuten.