Euskadiko Kooperatiben Konfederazioak mila lanpostu sortzea espero du

Konfekoop Euskadiko Kooperatiben Konfederazioak 2011n mila lanpostu sortzea espero du, egoera ekonomikoa "oso-oso delikatua" bada ere. Joan den urtean 800 lanpostu baino gehiago sortu zituen.

Agustin Mendiola Lan Elkartuko Kooperatiben Federazioko zuzendariak, Patxi Ormazabal Konfekoopeko presidenteak eta Juan Mari Concha Erkideko bere homologoak esan dituzte horiek Bilbon, prentsaurreko batean.

2010ean, Konfekoopen fakturazioa % 4 hazi zen, neurri handi batean kooperatibak nazioartera zabaltzearen ondorioz. Fakturazioaren % 42 atal honi dagokio eta bere garrantzia % 65era igotzen da, kontsumo kooperatibak (merkatu nazionala dute hauek) kanpoan utzita.

Nazioartera zabaltzeak 4.240 milioi euro ekarri zizkien kooperatibei, aurreko urteko emaitzaren (2.066 milioi euro) bikoitza.

"Oro har, egoera 2009koa baino hobea da. Esparru gehienetan izan ditugu hobekuntzak: enpleguan, fakturazioan, esportazioetan eta kooperatiba kopuruan. Garapen bidea mantsoa da, baina datuak positiboak dira", esan du Ormazabalek.