Ekonomia -
Lan-istripua
Langile bat hil da Arrigorriagako industrialdeko tailer batean
Beharginak 57 urte zituen eta Berasategi tailerrean egiten zuen lan. Sindikatuek 24 orduko lanuztea deitu dute ostiralerako.
eitb.eus
Langile bat hil egin da Arrigorriagako Txako industrialdeko tailer batean lanean ari zela, Segurtasun sailak aditzera emandakoaren arabera.
Lan-istripua 07:00ak aldera gertatu da eta, lehen informazioen arabera, hildakoa altuera handi batetik erori da.
ELA sindikatuak ohar batean aditzera emandakoaren arabera, hildako beharginak 57 urte zituen eta Talleres Berasategi enpresako langilea zen.
Sindikatuak azpimarratu duenez, dagoeneko 23 behargin hil dira Euskadin eta Nafarroan aurten izandako lan-istripuetan. Horiei, Zaldibarreko zabortegian harrapatuta hil ziren bi langileak gehitu behar zaizkie.
Bestalde, LAB sindikatuak salatu du enpresa horretan asteartean bueltatu zirela lanera, "eta oraindik ez dute koronabirusari aurre egiteko protokolorik aurkeztu".
"Une gogorrak bizi ditugu, langileriak nahiz gizarteak, oro har. Lanera bueltatzera behartu gaituzte, gure osasuna eta bizitza bermatu gabe eta egoera kontrolpean izan barik. Erakunde publikoek eta patronalek diruari eman diote lehentasuna, beharginen bizitzaren kaltetan", kritikatu du ohar batean.
Talleres Berasategi enpresako langileek 24 orduko lanuztea egingo dute ostiral honetan eta, eguerdian, elkarretaratzea egingo dute lantegiaren aurrealdean lan-istripua salatzeko, ELA, LAB, ESTEE eta ESK sindikatuek deituta.