Ekonomia -
Koronabirusa
Maiatzaren amaierarako Bilbon hegaldiak egotea espero dute nazioarteko konpainiek
Aer Lingus eta Easyjet gainerakoei aurreratu zaizkie eta hegaldiak eskaintzen dituzte maiatzaren 2rako eta 8rako.
agentziak | erredakzioa
Nazioarteko aire konpainia nagusiek Bilboko hegaldi zuzenak maiatzaren amaieran edo ekainaren hasieran berrezartzea espero dute, haien webguneetan agertzen denez, baina Aer Lingusek maiatzaren 2tik aurrera ere eskaintzen ditu.
Martxoaren amaieran utzi zituzten bertan behera Bizkaiko hiriburura zihoazen hegaldiak edo handik abiatzen zirenak, koronabirusa Europan zabaltzen ari zenean eta herrialde batzuk konfinamendua ezarri eta nazioarteko bidaiak debekatu ahala; eta hasiera batean, apirilaren amaieran eta maiatza hasieran itzuli nahi zuten ohiko jarduerara.
Osasun krisiaren zabalkundearekin, Bilboko aireportuan konexioak dituzten nazioarteko aireko konpainiek (Air France, British Airways, Lufthansa, KLM eta Turkish Airlines) atzeratu egin behar izan dituzte asmoak maiatzaren amaierara edo ekainaren hasierara arte.
Kontrako jarrera dute Aer Lingus irlandarrak eta Easyjet britainiarrak eta TAP portugaldarrak; izan ere, lehenengo biek maiatzaren 2an eta 8an hegaldiak eskaintzen dituzten arren, TAPek ez du eskaintzarik uztailaren 1a arte.
Tartean kokatzen da British Airways, bidaia-txartelen salmenta maiatzaren 16tik aurrera eskaintzen duelako.
Maiatzaren 29an Istanbul eta Bilbo arteko hegaldiak berreskuratu nahi ditu Turkish Airlainek, eta Volotea ere orduan da hastekoa.
Ekainaren 1era arte itxarongo dute, aldiz, Air Francek, Lufthansak eta KLMk.
