Eusko Jaurlaritzak IAT pasatzeko epeen berri eman du

Ekonomiaren Garapen eta Azpiegitura Sailak jakinarazi du zein diren pandemian IAT pasatu behar zuten ibilgailuek izapide hori betetzeko epemugak, baldin eta alarma-egoera hilaren 21ean amaitzen bada.

Epe horretan, ziurtagiri horien baliozkotasuna luzatzea erabaki zen. Hasiera batean, luzapena 30 egun naturalekoa zen, baina geroago luzatu eta malgutu egin zen IATaren iraungitze-dataren arabera.

Horrela, martxoaren 20a baino lehen azterketa egin behar zuten ibilgailuek abuztuaren 5era arteko epea izango zuten, hau da, 45 egun alarma-egoera amaitzen denetik. Martxoaren 21-27 asteko autoek 15 egun gehiago izango lituzkete, 60 guztira, beraz, abuztuaren 20a baino lehen gainditu beharko lukete.

15 eguneko tarte gehigarri hori astetik astera handitzen da, eta, beraz, ekainaren 21a baino lehen iraungiko zen IAT duten autoek 2021eko martxoaren 3ra arteko epea izango dute.

Arau hau alarma-egoeran ikuskapena iraungita duten mota guztietako ibilgailuei aplikatzen zaie, landa-lanetan diharduten nekazaritzako ibilgailuei izan ezik, horien IATaren baliozkotasuna azaroaren 10era arte luzatuko baita.

IAT gainditutakoan, txartelean agertzen den balio-data hartuko da erreferentziatzat, eta ez da inola ere zenbatuko alarma-egoera deklaratzearen eta haren ondorengo luzapenen ondorioz emandako ziurtagirien luzapena.

Azterketa egin bitartean segurtasuna bermatzeko, beharrezkoa izango da maskararekin joatea eta ibilgailutik ez irtetea. Bulegoetan 2 metroko distantzia eta gehieneko edukiera errespetatuko dira, ahal dela txartelarekin ordainduko da eta dokumentazioa "garbiketa-baldintza egokietan" entregatuko da, beste gomendio batzuen artean.