Etxebizitzak berritzeko plan bat abiatuko dute Bilbon auzo kalteberetako familientzat

Bilboko Udalaren Hiri Berroneratzearen Sailak, Surbisa hiri-birgaiketako udal sozietatearen bitartez, etxebizitzetako obretarako dirulaguntzak emateko ezohiko programa bat jarri du abian, auzo kalteberetako higiezinei lehentasuna emango diena, eta 2020an 500.000 euroko aurrekontua izango duena.

'Bilboko Etxebizitzen Renove Plan' horren bidez, gizarte kohesioa sustatu nahi da, eta, horretarako, laguntzak emango zaizkie auzo kalteberetan bizi diren pertsonei, euren etxebizitzetan obrak egin ditzaten, kalitatea, erosotasuna eta ingurumen-neurriak hobetzeko.

Gainera, eraberritzeen eta obren sektoreko enpresen, gremioen, autonomoen eta profesionalen jarduera sustatu nahi du, sektore horretako enpleguei eustearren edo berriak sortzearren, ahalik eta lasterrena eta deslokalizazioa saihestuz, eta, aldi berean, materialen eta instalazioen industria jarduerari eraginez.

Horretarako, Surbisaren Administrazio Kontseiluak laguntza horiek arautzeko oinarriak onartu ditu, eta aurtengo urriaren 30era arte eskatu ahal izango dira. Besteak beste, eskatzaileek beren etxebizitzak barrutik birgaitzeko obrak finantzatu ahalko dituzte, babestuko den aurrekontua gehienez 6.000 eurokoa eta gutxienez 1.000 eurokoa izango delarik, eta itzuli beharrik gabeko dirulaguntza baten bidez inbertsioaren % 20 emango da, gehienez ere, etxebizitzako, 1.200 euro emango direlarik.

Udalak adierazitakoaren arabera, auzo kalteberenetan bizi diren familiek egiten dituzten obrei emango zaie lehentasuna. Dirulaguntza horien onuradunak Bilboko 30 auzotan kokatutako etxebizitzen titularrak izan daitezke, eta programa honetako 2020rako aurrekontua 500.000 eurokoa da.

Laguntzen eskabidea www.bilbao.eus webgunean izapidetu daiteke, webgune bat gaitu baitute eskaerak aurkezteko epea hastearekin batera, edo Surbisako bulegoetan, hitzordua aurrez aurre edo posta elektronikoz eskatuta.

Ekimena pandemiaren aurrean gizarte kohesioa, suspertze ekonomikoa eta hiriko enplegua eta kultura sustatzeko premiazko neurrien Bilbao Aurrera udal-planaren barruan kokatzen da. Planak 15 milioi euroko aurrekontua du, eta aurten bertan jarriko dira indarrean ezohiko 50 neurri baino gehiago.