Euroguneko liderrek erreskate funtsaren errefortzua azkartu nahi dute

G20an parte hartzen duten euroguneko liderrek (Angela Merkel Alemaniako kantzilerra, Nicolas Sarkozy Frantziako presidentea, Jose Luis Rodriguez Zapatero Espainiako presidentea eta Silvio Berlusconi Italiako lehen ministroa) 440 milioi euroko erreskate funtsa errefortzua bizkortzeko konpromisoa hartu dute. Helburu nagusia, hain zuzen, Greziako krisia Espainia, Italia edota beste Estatu batzuetara ez zabaltzea da. G20ko bileraren atarian bildu dira ordezkariak eta Europako Finantza Egonkortasunerako Funtsaren "errefortzua bizkortzeko konpromisoa hartu dute "ahalik eta azkarren" martxan jartzeko asmoarekin, zenbait iturri politikok jakinarazi dutenez. Bilkura horretan Greziako egoera aztertu dute, Herman Van Rompuy Europako Kontseiluko presidentea, José Manuel Durao Barroso Europako Batzordeko presidentea eta Christine Lagarde Nazioarteko Diru Funtsako zuzendaria izan dira. Joan den urriaren 26an euroguneko liderrek erreskate funtsa bilioi bat euroraino handitzea adostu zuten. Hori Espainiako eta Italiako zor jaulkipen berrien zati bat bermatzeko erabiltzen ari diren mekanismoa jarraituz eta Txina bezalako lurralde azaleratuen inbertsio pribatua erakarriz lortuko da. Hala ere, Euroguneko goi-bilerak ez zuen mekanismo hauek nola funtzionatuko zuten zehaztu, eta Klaus Regling funtsaren arduradunak Txinara eta Japoniara egindako bidaia konpromiso zehatzik lortu gabe amaitu da. Merkelek eta Sarkozyk asteazkenean iragarri zutenez, euren Ekonomia ministroei eta Olli Rehn Ekonomia gaietarako komisarioari funtsa indartzeko lanak bizkortzeko eskatu diete krisia Espainiara edota Italiara kutsatzeko arriskua sahiesteko.

Euroguneko liderrek erreskate funtsaren errefortzua azkartu nahi dute

Esteka kopiatuta