PNV, PSE eta Bilduk oraindik ez dute akordiorik lortu Kutxabanki buruz

EAJk, PSEk eta Bilduk gaurko 09:00ak arte negoziatuko dute Kutxabanken administrazio kontseiluaren inguruan, izan ere, BBK-k eta Kutxak asanbladak egingo dituzte ordu horretan banku berriaren zuzendaritzako ordezkariak hautatzeko.

EAJk asteazken honetan bertan helarazi die eskaintza bat PSE-EEri eta Bilduri Administrazio Kontseiluari buruz eta beste alternatiba batzuk bilatzeko prest agertu da akordiorik ezean, Europa Press albiste-agentziak negoziazioetako iturriak aipatuta jakitera eman duenez.

Kutxabanken Administrazio Kontseilua osatzeko, BBK-k 20 kidetik 12 aukeratuko ditu, Kutxak sei eta Vitalek bi. Hiru kutxek batzarrak egingo dituzte bihar ordezkariak izendatzeko.

Azken orduotan, alderdien arteko harremanak ugaritu egin dira akordioa lotzeko, izan ere, orain arte ez dute ezer hitzartu. PSE-EEk ez du nahi EAJk gehiengo osoa izatea eta hori gertatuz gero kontseiluan ez sartzea erabaki dezakeela adierazi du. Bilduk ere bat egin du iritzi horrekin eta ez dago EAJk gehiengo osoa izatearen alde.

EAJk proposamena helarazi die sozialistei eta abertzaleei kontseiluaren osaeraren inguruan, baina adostasunera iristea zail ikusten duenez, Euzko Alderdi Jeltzaleak beste aukera batzuk ere aurkeztu omen ditu bi alderdien jarrerak gerturatzeko, izan ere, badirudi PPrekin adostasunera iritsi dela.

Bilduren iritziz, koalizioak sei ordezkari izan beharko lituzke Administrazio Kontseiluan, baina ordezkariren bat beste alderdiren baten esku uzteko prest agertu da erakundeari "ahalik eta aniztasun gehien" emate aldera.