Jaurlaritza 'doikuntza' neurriak prestatzen ari da

Carlos Aguirre Ekonomia sailburuak iragarri du Jaurlaritza "diru-sarreren eta gastuen doikuntza" prestatzen ari dela diru-bilketaren beherakada dela eta.

Aguirrek horixe erantzun dio Legebiltzarrean PPk aurtengo aurreikuspen ekonomikoaren inguruan egindako galderari.

Ekonomia eta Ogasun sailburuak azaldu duenez, "Espainiako eta Euskadiko hazkunde aurreikuspenek agerian uzten dute 2012an diru-bilketa jaitsi egingo dela".

Gogoratu duenez, Dirubideen Euskal Kontseiluak urte honetarako aurreikusi dituen zerga bidezko diru-sarrerak 12.117 milioi eurokoak dira, baina ekonomiaren hazkuntza % 1,4koa izango zela kontuan hartuta egin ziren kalkuluak.

Hala ere, Espainiako Gobernuak autonomia erkidegoei 2012an BPGren % 0,5eko jaitsiera aurreikusten duela adierazi diela gogoratu du. Aurreikuspen berri horiek kontuan hartuta erkidegoek "berriro orekatutako ekonomia eta finantza plana" egin beharko dute eta Ogasun Ministerioari aurkeztu.

Ekonomiaren beheranzko joerak bilketa murriztea ekar badezake ere, 2012ko diru-sarreren eszenatokia gauzatu zenean "oso irizpide kontserbadorea" erabili zela esan du, eta ez zela ondoren onartutako aldaketa fiskalik jasotzen. Horien artean Ondarearen Gaineko Zergaren berreskuratu izana aipatu du.

Zerga-sisteman izandako aldaketa horiek, indarrean sar daitezkeen beste batzuekin batera, "BPGren balizko beherakadak eragindako diru-bilketaren jaitsiera orekatuko" duela azaldu du.