Euskal Finantzen Kontseiluak diru-bilketaren inguruko bilera hasi du

Euskal Finantzen Kontseilua batzartuta dago gaur iazko diru-bilketa ixteko. Lehen aurreikuspenen arabera, hasieran uste zena baino 1.000 milioi euro gutxiago bildu dituzte.

Bilera 17:00etan abiatuko da, eta diru-bilketa ez ezik, aportazioak, atzerapenak, eta abalak ere hartuko dituzte hizpide.

2011ko Aurrekontuak egiteko Euskal Finantzen Kontseiluak urrian egin zituen aurreikuspenen arabera, diru-bilketa 12.500 milioi eurokoa izango zen, baina azkenean 1.000 milioi euro gutxiagokoa izan da.

Bilera azken aldian Eusko Jaurlaritzak eta Bizkaiko Aldundiak izandako polemikak baldintzatuta dator. Hain zuzen ere, iruzur fiskalaren harira etorri da polemika.

Bizkaiko Aldundiak Jaurlaritzarekin datu fiskalak ez elkarbanatu nahi izanak Harmonizazio Legea urratzen duen ala ez frogatzeko txosten bat egiten ari dira Eusko Jaurlaritzaren zerbitzu juridikoak, Patxi Lopez lehendakariak jakinarazi duenez.

Jose Maria Iruarrizaga Bizkaiko Ogasun diputatuak astelehenean azpimarratu zuen, beste behin, ez dituztela datuak online konexioetan elkarbanatuko horrek ez duelako "inolako ekarpenik" egiten eta hori ez dela "behartu" behar azpimarratu du.

Bilera, hain justu, Patxi Lopezen Gobernuak eta EAJk Eusko Jaurlaritzaren Kontuen egoeraren inguruan izan dituzten desadostasunen ondoren gauzatuko da. Iñigo Urkullu EAJko presidenteak esan zuenez, "egoera ekonomiko larria" dela eta, Jaurlaritzatik laguntza eskatuz dei bat jaso zuen. Elkarrizketa horietan, alegia, "osasun zentimoa" ezartzeko aukera aztertu zuten.

Jaurlaritzak, porrotaren aukera ukatu du, baina "osasun zentimoaren" aukera ezartzea aztertzen ari direla aitortu du eta gai hori, hain zuzen, Aldundiekin eztabaidatuko duela esan du, baina ez omen dago Euskal Finantzen Kontseiluaren gai-zerrendan sartuta.