Ekonomia -
Bikoiztasunen batzordea
Garaikoetxeak Batzar Nagusien eskumenak gutxitzea eskatu du
Eusko Jaurlaritzak eskatutako txosten baten arabera, gutxienez 403 milioi euro xahutzen dira zerbitzu bikoiztuetan.
Erredakzioa
Carlos Garaikoetxea lehendakariak euskal erakunde sarearen "argaltzea" defendatu du. Horretarako, Batzar Nagusien eskumenak gutxitzea eta herri batzuk elkartzea eskatu du egungo bikoizketa burokratikoa arintzeko.
Euskadik lau parlamentu izateak "alarma" sortzen duela esan du eta hiru lurraldeetako Batzar Nagusiak foru-aurrekontuen "kontrol batzorde" bilakatzea proposatu du.
Eusko Alkartasuneko presidente eta lehendakari ohiak bikoizketak aztertzen dituen Jaurlaritzaren batzordean hitz egin du. Erakunde honek eskatutako txosten baten arabera, gutxienez 403 milioi euro xahutzen dira Eusko Jaurlaritzaren, Aldundien eta udalen arteko bikoizketengatik.
"Tradizioak garrantzitsuak dira, baino batzuetan denborak aurrera egin ahala, hobetu egin behar dira", esan du Garaikoetxeak Lurralde Historikoen Legea (LHL) moldatzeko beharra justifikatzeko. "Orain 30 urtetik egiteke dago eta adostasun politiko handi bat behar da egungo euskal erakunde sarea erregulatzeko".
Gorka Maneiro UPyDko legebiltzarkideari erantzunez, Aldundiak ezabatzearen alde egingo lukeela esan du Garaikoetxeak, “historiaren parte izango ez balira”, baina onena estrukturak eta eskumenak gutxituz erakunde hauei "dimentsioak berritzea" dela adierazi du. Gainera, herri batzuk elkartzea eta Udal Lege baten bitartez eskumenak eta baliabide ekonomikoak argitzea eskatu du.