Rehnek dio Espainiaren erreformak "eredu" direla gainerakoentzat

Olli Rehn Europako Batzordeko presidenteordeak esan du Espainia eta Italiaren erreforma estrukturalak "eredugarriak" izan beharko liratekeela eta zor publikoaren inguruko tentsioak baretzen lagundu dutela.

Europako Ekonomia Ministroen bileraren (Ecofin) osteko prentsaurrekoan azaldu duenez, Europar Batasunak "pauso erabakigarriak" eman ditu "fronte guztietan" zorraren krisiari irtenbidea emateko.

Atzeraldia laburra izan daiteke erantzun politikoa "erabakigarria eta irmoa" bada, azpimarratu du.

Horren harira, Europar Batasunaren aginte ekonomikoa "erabat erreformatu" dutela goraipatu du, izan ere, "six pack" onartu dute (bost arau eta zuzentarau bat), eta horren bidez isunak jarriko dizkiete defizit eta zor helburuak betetzen ez dituztenei eta baita desoreka makroekonomikoak dituztenei, itun fiskalarekin eta finantza sektorearen berregituraketarekin.