Ekonomia -
212ko Aurrekontuak
Cospedal: 'Aurrekontuek gizarte zerbitzuak mantentzea dute helburu'
PPko idazkari nagusiak adierazi duenez, 27.300 milioi euroko murrizketa ekarriko duen 2012ko Aurrekontuen onarpena "Gobernuak egindako ekintza ausarta eta erantzulea" da.
Erredakzioa
Maria Dolores de Cospedal PPko idazkari nagusiaren esanetan, 27.300 milioi euroko murrizketa ekarriko duen 2012ko Aurrekontuen onarpena "Gobernuak egindako ekintza ausarta eta erantzulea" da. Halaber, Cospedalek azpimarratu duenez, Espainia "fidagarria" da dagoeneko eta aurrekontuek "gizarte zerbitzuak mantentzea" dute helburu.
"Espainia herrialde fidagarri bat da dagoeneko eta are fidagarriagoa izango da urtearen amaieran % 5,3ko defizit publikoaren helburua betetzean", esan du Cospedalek ostiral honetan onartutako aurrekontuak aztertzeko PPko zenbait kideekin egindako bilera baten ostean.
Alderdi popularraren idazkari nagusiaren arabera, "egun, Espainiak sinesgarritasuna du", zor publikoaren azken enkanteek erakutsi dutenez. Gainera, Europako hainbat bazkidek neurri hauek txalotu izana zoriondu du.
Cospedalek gogoratu duenez, defizit publikoaren helburu hauek Bruselak Zapaterori ere exijitu zizkion. Ondorioz, Moncloan botere-aldaketa izan arte, "benetako konpromisoa" hartu ez izana gaitzetsi du.
Honen arabera, hartutako neurriak "zentzudunak" dira, "halabeharrezko defizitaren helburua bete ahal izateko". "Bide zuzena da, zaila bada ere, susperraldirako lagunduko duen bidea, hain zuzen ere", gaineratu du.
