Ekonomia -
Krisiaren kontrako erreformak
PSOE: 'Hezkuntza eta Osasuna gainditu ezinezko mugak dira'
Elena Valencianok Luis de Guindos Economía ministroak egindako adierazpenei erantzun die. De Guindosek hurrengo erreformak zerbitzu publikoetan egingo dituztela iragarri zuen.
Erredakzioa
PSOErentzat "Hezkuntza eta Osasuna lerro gorri gaindiezinen artean" daudela adierazi du Elena Valenciano sozialisten idazkariorde nagusiak, eta, ondorioz, PSOEk "defendatu" egingo dituela azpimarratu du.
Valencianok Altean, Alacanten, egin ditu adierazpenok, Luis de Guindos Ekonomia ministroak Frankfurter Allgemeine egunkari alemaniarrari esandakoei erantzun die. Bertan esandakoen arabera, hurrengo erreformak zerbitzu publikoei eragingo diete, Osasunari eta Hezkuntzari, batez ere.
PSOEko idazkariorde nagusiaren ustez, zalantzan dago De Guindosek "Rajoyk inoiz ere egingo ez zuena" (Osasuna eta Hezkuntza erreformatzea) egingo dutela iragartzeko "lekurik onena" hautatu duen ala ez, hau da, atzerriko hedabide batean egitea.
Segurtasuna eta berdintasuna
"Krisi garaian, Hezkuntza eta Osasuna dira segurtasuna eta berdintasuna gehien bermatzen duten gaiak, eta hori azpimarratu dugu guk", esan du Valencianok. "Beti dira garrantzitsuak, baina krisi garaian oraindik garrantzitsuagoak dira", gaineratu du.
Valencianoren ustez, PPk "murrizketei erreformak deitzen die, eta hori izango da jarraituko duten bidea".
