Ekonomia -
Epaia
Euskaltelek 222 milioi eurotik gora ordaindu behar dizkio Orangeri
Euskaltelen iritzian, zigorra "bidegabekeria historikoa" da, baina, hala ere, aurre egingo dio eta bere jarduera eta inbertsioekin normaltasunez jarraituko du.
Erredakzioa
Euskal Autonomia Erkidegoko Justizia Auzitegi Nagusiak (EAEAN) Arbitrajerako Nazioarteko Auzitegiaren epaia onartzea erabaki du. Hori dela eta, Euskaltelek 222 milioi euroko kalte-ordaina eman beharko dio Orangeri (Amenaren ondorengoa da eta France Telecom du jabe).
Arbitraje-laudoaren arabera, Euskaltelek "hautsi egin zituen kontratuetan jasotako klausulak".
Iazko urtearen amaieran, Auzitegi Nagusiak baztertu egin zuen Orangeren eta Euskaltelen argudioak entzuteko bista bat egitea, aipatutako kalte-ordainaren gainean aurkeztutako alegazioei buruz epaia eman aurretik.
Zigorrari aurre egiteko, bere bazkideen laguntza duela esan du Euskaltelek. Komunikatu batean telekomunikazioen euskal enpresak adierazi duenez, isuna "bidegabekeria historiko" baten emaitza da, eta bere jarduera eta inbertitzeko, hazteko eta herriarentzat aberastasuna sortzeko plan estrategikoekin normaltasunez jarraituko duela esan du.
Halaber, Zuzenbideak erabaki horren aurrean helegitea aurkezteko edo horren aurka egiteko ematen dituen aukera guztiak aztertuko ditu.
Euskaltelek azaldu duenez, prozesu hau hor dago France Telecom konpainiak (Frantziako Gobernua du akziodun nagusi) "Frantzian izandako arbitraje prozesu bat baliatu nahi izan zuelako, Euskaltelen argudioak, epaile espainiarrak bere boto partikularrean emandakoak, prozeduraren zuzenketak, zuzenbide espainiarraren arauak, eta inork behartu gabe eta euren borondatez Euskaltelekin jarraitzea erabaki zuten milaka bezeroen erabakia kontuan izan gabe".
"France Telecomek bulegoetan irabazi nahi izan du merkatuan irabazi ezin izan zuena, lehiakide bat desorekatzea zuelako helburu bakarra", salatu du. Akordioa bertan behera Bi enpresen arteko auzia 2006an abiatu zen, Euskaltelek eta Amenak (gaur egun, Orange) EAEn telefono-zerbitzua emateko 1999an sinatu zuten akordioa hautsi zutenean.
Euskaletelek telefonia mugikorreko operadore birtual bihurtzea erabaki zuen orduan, eta horrek merkataritza borroka eragin zuen bi enpresen artean, 450.000 bezero bereganatzeko.