Ekonomia -
Finantzak
Aste beltza kriptodiruaren merkatuan, egun bakarrean 200.000 milioi dolar galduta
Bitcoin, Ether eta TerraUSD kriptomonetek behea jo dute, inbertitzaileak kriptodirua baztertzen ari direlako. Inflazioak, interes-tasen igoerak eta aurreikuspen ekonomikoek kalte egin diete.
Agentziak | EiTB Media
Kriptodiruaren merkatuak 200.000 milioi dolar baino gehiago galdu ditu egun bakarrean, CNBCk jakitera eman duenez. Besteak beste, Bitcoin kriptomoneta nagusia 26.000 dolarren azpitik kokatu da 16 hilabetetan aurrenekoz, bost jardunalditan ia % 20 galduta.
Ether, bigarren kriptomoneta, 1.719 dolarrean kotizatzen ari da ostegun honetan. 2021eko uztailetik ez zen 2.000 dolarren azpitik kokatzen.
Inbertitzaileak kriptodirua baztertzen ari dira. Inflazioak, AEBko Erreserba Federalak interes-tasen igoera politikak eta aurreikuspen ekonomikoek kalte egin diete.
Era berean, asteazkenean, TerraUSD kriptomonetak lurra jo zuen, haren balioa 23 zentabora jaitsi baitzen. Aldi berean, sortzaileak produktua "berreraikitzen" saiatuko dela iragarri zuen, oinarri duen mekanismo konplexua aldatuz eta kapital gehiago bilatuz.
Kriptomoneta merkatuaren beherakadan murgilduta, TerraUSDk dolarrarekin parekotasuna hautsi du aste honetan, eta pixkanaka-pixkanaka bere prezioak behea jo du, Lunarekin gertatu bezala. Azken kriptodibisa horrek ere, bere balioaren zati handi bat galdu du.