Ekonomia -
Erregaiak
Gasolina eta gasolio litroa bi euroren gainetik, eta 20 zentimoko diru-laguntza ia 'jan' dute dagoeneko
Iazko prezioekin alderatuta, gasolina litroa batez beste % 55,7 garestitu da, eta gasolioa % 64. Iragan otsailean Errusiak Ukraina inbaditu zuenetik, bi erregaien prezioek % 30 egin dute gora.
Agentziak | EiTB Media
Gasolinaren eta gasolioaren batez besteko prezioak marka berria hautsi du aste honetan, eta bi euroen langa gainditu du dagoeneko. Horrela, iragan apirilean Espainiako Gobernuak martxan jarritako 20 zentimoko diru-laguntza ia 'jan' dute bi erregaiek.
Konkretuki, gasolina litroaren batez besteko salneurria 2,117 eurokoa da aste honetan, duela zazpi egun baino % 3,36 garestiagoa, Europar Batasuneko Petrolio Aldizkariaren arabera.
Dieselaren kasuan, gasolioak % 4,54 gora egin du azken astean, bi euroen langa (2,003 euro) lehen aldiz gaindituz.
Iazko prezioekin alderatuta, gasolina litroa batez beste % 55,7 garestitu da, eta gasolioa % 64, baina indarrean dagoen hobaria kontuan hartu barik.
Iragan otsailean Errusiak Ukraina inbaditu zuenetik, bi erregaien prezioek % 30 egin dute gora.
Horrela, berunik gabeko gasolina 95 Europar Batasuneko batezbestekoaren gainetik dago Espainian jadanik; izan ere, litroa 2,042 euroan dago EBn. Hala ere, eurogunean garestiago jarraitzen du izaten: 2,097 euro.
Dieselari dagokionez, Espainian ere EBn (1,981 euro) baino garestiagoa da, baina eurogunean baino merkeagoa (2,029 euro).