Ayesa akordio batera iritsi da akziodunekin Ibermaticaren % 100 erosteko

Ayesa, teknologia- eta ingeniaritza-zerbitzuen hornitzaile globala, akordio batera iritsi da ProA Capitalekin eta beste akziodun minoritario batzuekin, horien artean ONCE eta Kutxabank, Ibermaticaren % 100 erosteko. Transakzioa datozen hilabeteetan ixtea espero da, behin eskuduntza duten agintariek onartu ostean. Ez dira xehetasun ekonomikoak jakinarazi.

Ayesak ohar baten bidez jakinarazi duenez, eragiketa honen helburua zerbitzu digitaletan liderra den talde bat osatzea da, "eraldaketa digitaleko proiektu nagusietan bezero handiei laguntzeko gaitasuna izango duena".

Bi konpainien baterako fakturazioa 600 milioi eurokoa da, eta, beraz, Espainiako IT merkatuko lehen bost eragileetako bat dira. A & M Capital Europe inbertsore nagusi bilakatu zenetik, Ayesak hazkunde organikoko eta erosketen bidezko plan bat abiarazi du, eta Ibermáticarena aurten gauzatuko den hirugarren eragiketa korporatiboa izango da.

Enpleguari dagokionez, nazio-mailako plataforma teknologiko handienetako bat osatuko dute, 70 diziplina baino gehiagotan espezializatutako 11.000 profesional baino gehiagorekin. Taldeak zerbitzuak indartuko ditu adimen artifizialean, datuen analitikan, prozesuen automatizazioan eta robotizazioan edo cloud-eko aplikazio natiboen garapenean.

Nazioartean, 22 herrialdetan izango du sare komertzial eta operatiboa. Azken batean, dauden sinergiek negozioa modu "nabarmenean" bultzatuko dutela uste dute, oso eskaintza lehiakorra izango baitu 'end to end' proiektu teknologikoei ekiteko, teknologien, esperientziaren eta ezagutza funtzionalaren konbinazioa ardatz hartuta.

Operazioa iragarri ondoren, Ayesak azpimarratu du Ibermaticaren integrazioak bere presentzia sendotuko duela jarduten duen lurraldeetan, eta egoitza Euskadin mantenduko duela, egungo tokian.

Ayesak 6.300 langile baino gehiago ditu, eta presentzia zuzena du Europa, Amerika, Afrika eta Asiako 20 herrialdetan. Enpresentzako eta administrazio publikoentzako irtenbide digitalak garatzen eta ezartzen ditu, eta azken teknologiak aplikatzen ditu azpiegiturak diseinatu eta gainbegiratzeko. 2021ean, Jose Luis Manzanares Abasolo buru duen taldeak 322 milioi euroko salmentak lortu zituen.

Abasolok nabarmendu duenez, "bi konpainien ezarpen geografikoa eta zerbitzu-eskaintza elkar osatzen dira. Gure bezero handiek eraldaketa digitaleko proiekturik handienak gure esku utzi ahal izango dituzte, gure gaitasun eta zerbitzu teknologikoak modu naturalean zabalduko baititugu. Horrekin batera, zuzendaritza-taldeen baturak lider bihurtzen gaitu talentuan eta lidergoan, estatuko eta nazioarteko sektore teknologikoan".

Ibermatica 1973an sortu zen, eta konpainia eta administrazio publiko handiak digitalizatzen egiten du lan gehien. Zerbitzu digitalen aukera zabala eskaintzen du software-aplikazioen eta azpiegituren garapenaren eta mantentze-lanen arloetan, eta, horrez gain, sortzen doazen azken teknologiak ezartzen ditu, hala nola adimen artifiziala, datuen analitika aurreratua, zibersegurtasuna eta hodeirako migrazioaren arloetan, besteak beste. 2021eko itxieran 4.750 langile zituen eta 276 milioi euroko fakturazioa.

Juan Ignacio Sanz Ibermaticako buruaren ustez, "Ibermaticak jauzi kualitatiboa emango du, hedatzen ari den enpresa-proiektu sendo batean sartuko baita, sinergia komertzial garrantzitsuekin eta erronka handiko etorkizun profesionalarekin. Talentu teknologiko onenaren zati handi bat bilduko dugu, gure sektoreetako esperientzia funtzionala eta berrikuntza-potentziala ".