Euroguneko langabezia-tasa hamarren bat jaitsi da uztailean, % 6,6ra

Euroguneko langabezia-tasa hamarren bat jaitsi zen uztailean, ekainarekin alderatuta, eta % 6,6an kokatu zen 2022ko zazpigarren hilabetean; Europar Batasunean ere hamarren bat jaitsi zen, % 6ra arte, Eurostat Europar Batasuneko estatistika-bulegoak ostegun honetan jakinarazi duenez.

Eurostaten datuen arabera, % 6,6ko tasa hori Hemeretzien artean 1998ko apirilean hasitako serie historiko osoan izandako langabezia maila txikiena da. Europar Batasuna osatzen duten hogeita zazpi herrialdeen tasa ere serieko txikiena da. 

Euroguneko langabezia-tasa pandemiaren aurretik zegoena baino zortzi hamarren txikiagoa da; 2020ko otsailean % 7,4koa zen euroguneko langabezia. 

Espainiak du EB osoko langabezia-tasarik handiena % 12,6koa. Ondoren Grezia  dago, % 11,4ko tasarekin eta hirugarren Italia % 7,9ko langabezia-tasarekin.