Rajoy: 'Espainia ez dago erortzeko zorian eta ez du hondoa joko'

Mariano Rajoy Gobernuko presidenteak adierazi duenez, "egungo krisi larriak beldurra eragitea normala bada ere, Espainia ez dago erortzeko zorian, ez du hondoa joko eta ekaitza gaindituko du, guk egindako esfortzuarekin eta Europar Batasuneko babesarekin".

Gobernuko presidenteak Ekonomia Zirkuluak antolatzen dituen ekonomia jardunaldien XXVIII. edizioaren itxiera-ekitaldian parte hartu du, eta "lasaitasuna" eskatu du, arrisku-sariak berriro markak hautsi dituen aste honetan. "Espainiak ekaitza gaindituko du, bere esfortzuari eta Europar Batasuneko kideen laguntzari esker", esan du.

"Krisialditik irten egingo gara, izan ere, jokoan dagoena ez da bakarrik Espainiaren etorkizun ekonomikoa, Europako Diru Batasunaren jarraipena baizik", azpimarratu du. "Egoera honetan, Espainia eragile bat da, baina beste asko daude. Ez da ez bakarra, ezta okerrena ere", esan du.

Apokalipsiaren bezperan

Exekutiboburuak onartu duenez, "zailtasunak oso larriak dira eta inork ezin du hori zalantzan jarri" baina "Espainia ez dago Apokalipsiaren bezperan".

Kataluniatik batez ere etorritako enpresari garrantzitsuenak entzule zituela, Espainiak "indar ekonomiko argia du baina hobetzeko tarte handia dago". Ondorioz, egungo uneetan "onena ez da beldurrak areagotzea, horrek herrialdea irrazionaltasunera eramango luke".

Bankia

Bankiaren nazionalizazioari buruz, Rajoy esan duenez, "saneatzeko eta, ondoren, saltzeko egin dugu", Rajoyren esanetan, eta antzeko egoera bat bizi izan zuten beste herrialde batzuek (AEBek esaterako) bankuak nazionalizatu zituztela eta, saldu ostean, irabaziak lortu zituztela esan du.

BEZaren igoera

Halaber, enplegua sortzeko eta diru-funtsak handitzeko BEZaren eta Gizarte Segurantzako kotizazioen igoera berri bat errefusatu du Mariano Rajoyk . "Ahal badugu, ez dugu BEZ igoko. Espero dut igo behar ez izatea", esan du.