Bilbao Dendak: 'Ordutegia zabaltzeak ez die mesede egingo merkatariei'

Bilbao Dendak Bilboko dendarien elkartearen ustez, saltokietako ordutegiak liberalizatzeak ez dio sektoreari lagunduko; izan ere, "kontsumo arazo bat da eta enplegu egonkorra sortzen ez den arte ez da kontsumorik egongo".

Juan Carlos Ercoreca Bilbao Dendaken presidenteak komunikatu baten bidez erantzun dio Gobernuak egindako proposamenari.

Igande eta jaiegunetan irekitzeko aukerari buruz Ercorecak esan duenez, "Bilboko saltzaile gehienak neurri horren aurka daude".

Gainera, merkataritzaren azterketarako Ikusmer Eusko Jaurlaritzaren behatokiak egin zuen ikerketaren arabera, euskal familien % 70 dendak igande eta jaiegunetan irekitzearen alde ez daudela erakutsi zuen.

Hala eta guztiz ere, Ercorecaren hitzetan, Bilbao Dendakek "ez irekitzea erabakitzen dutenak errespetatuko ditu, eta baimendutako igandeetan irekitzen dutenei babesa emango die".

Horrez gain, Madrileko Gobernuak egin duen denden ordutegia astean 72 ordutik 90era zabaltzeko proposamena kritikatu du, eta euskal araudia "urratzen" duela salatu du.

Euskadin, orain arte bezala

Eusko Jaurlaritzak saltokiak igande eta jaiegun gehiagotan irekitzea aztertuko duela iragarri du, baina, oraingoz, Euskadiko araudia orain arte bezala mantentzeko asmoa duela iragarri du.

Proposamen hori atzo bertan jaso zuela esan du Bernabe Unda Industria sailburuak, eta arau berri hori proposatzeko autonomi erkidegoak kontuan hartu ez izana aurpegiratu dio Gobernuari.

Sailburuak autonomi erkidego honek duen merkataritza "idiosinkrasia" kontuan izan behar dela eta Euskadin gaur egun indarrean dagoen araudiarekin (urtean zortzi igande eta jaiegunetan irekitzea) nahikoa dela esan du.