Ekonomia -
Bizkaia
83.600 hautagai baino gehiago aurkeztuko dira asteburu honetan Osakidetzako LEPera
LEP horretako gainerako hautaprobek urrian eta azaroan jarraituko dute, eta prozesuko azken azterketa azaroaren 25ean izango da.
Agentziak | EITB Media
83.600 hautagai baino gehiago aurkeztuko dira ostiral honetatik aurrera asteburu osoan BECen (Barakaldo) Osakidetzaren egonkortze prozesuari dagozkion Lan Eskaintza Publikoaren (LEP) azterketetara.
Bederatzi lanbide kategoriari dagozkie probak, eta izena eman duten gehienak zeladore (19.462), administrari laguntzaile (15.320), erizain (13.287) eta erizaintzako laguntzaile (12.961) lanpostuetarako hautagaiak dira, Osasun Sailak ostiral honetan jakinarazi duenez.
Ondoren, zerbitzu langile (8.747), administrari (8.034), laborategiko teknikari espezialista (2.138), fisioterapeuta (1.842) eta zerbitzu orokorretako gidari (1.813) kategoriak daude.
LEP horretako gainerako 79 kategorietarako hautaprobek urrian eta azaroan jarraituko dute, eta prozesuko azken azterketa azaroaren 25ean egingo da.
Sailaren arabera, LEP horrekin 11.000 profesional baino gehiago (Osakidetzako plantillaren herena) egonkortzeko prozesua amaitutzat emango da, eta bitartekotasun tasa % 8tik behera geratuko da.
Halaber, jakinarazi du azterketak hasiko dituzten lanbide kategorietan 2018-19ko LEParen deialdi guztien behin-behineko emaitzak argitaratu direla. Sindikatuek eta hautagaiek behin baino gehiagotan egina zuten eskari hori.