Ekonomia -
Ertzaintza
Segurtasun Saila 'Ertzainak borrokan' eta Euspelekin bildu da akordio bat bilatzeko negoziazioa abiatuz
'Ertzainak bororokan' kolektiboaren arabera, batzarrean lan-ildo bat martxan jartzeko konpromisoa hartu dute akordio bat bilatzeko, "soldata parekatzeak lekua izan dezan", eta hori "aurrerapauso handia" dela uste dute.
EITB Media
Eusko Jaurlaritzako Segurtasun Saila 'Ertzaina borrokan' kolektiboko eta Euspel sindikatuko ordezkariekin bildu da asteazken honetan. Batzar horretan lan-ildo bati heltzeko konpromisoa hartu dute, "parekatzeak lekua izan dezan", aldizkako lan-mahaiekin, 'Ertzainak borrokan' kolektiboak ohar baten bidez jakinarazi duenez.
Kolektiboak "aurrerapauso handitzat" jo du hori, baina uste du "ibilbide luzea" geratzen dela gainerako Euskal Poliziarekin (udaltzainekin) parekatzeko. Ertzainen kolektiboak eskerrak eman dizkio Euspeli bilera horietan parte hartzeko aukeragatik.
Ostiralean, hilak 23, Erandion (Bizkaia), 09:30ean, Euspel eta 'Ertzainak borrokan' berriro bilduko dira Eusko Jaurlaritzako Segurtasun Saileko ordezkariekin, eta protesta deitu dute Ertzaintzaren instalazioen kanpoaldean.
Euspelek salatu duenez, "13 urte daramatzate euskal funtzio publikoko pariak izaten, abandonatuta. Gainerako Euskal Poliziaren eta Euskadiko polizia integralen aldean soldatetan diskriminatuak. Langilerik, baliabiderik eta prestakuntzarik gabe".
Gainera, Euspelek eta 'Ertzainak borrokan' kolektiboak asteartean iragarri zuten martxoan zorroztasun-greba egingo zutela, eta ertzainei dei egin zieten arauak "zorrotz" betearazi ditzaten, beren lan-baldintzengatik protesta egiteko.