ELA eta LAB: 'Eskubideak lapurtu dizkigutelako, greba beharrezkoa da'

ELA, LAB, ESK, CNT, CGT, EILAS, HIRU eta EHNE sindikatuen esanetan, irailaren 26rako deitutako greba orokorra inoiz baino beharrezkoagoa da, "eskubide oinarrizkoenak lapurtu dizkigutelako".

Zentral horietako ordezkariek grebaren deialdia erroldatu dute gaur Bilbon, Eusko Jaurlaritzaren egoitzan.

Hain zuzen ere, urteko bigarren greba orokorra izango da EAEn eta Nafarroan. Aurrekoa martxoaren 29an egin zuten.

Endika Labort CNT sindikatuko bozeramaileak hedabideei adierazi dienez, irailaren 26ko greba orokorra martxoaren 29koaren "jarraipena" izango da, "ordutik jasan ditugun erasoak biderkatu egin direlako". "Inoiz baino arrazoi gehiago dago kalera irteteko", gaineratu du.

Greba orokorra ELA, LAB, EILAS, EHNE eta HIRU sindikatu abertzaleek eta CGT eta CNT zentral anarkistek deitu zuten, uztailaren 19an, hamarka eragile sozialekin batera.

CCOOk eta UGTk ez dute greba babestu, baina deitzaileetako batzuek (Txiki Muñoz ELAko idazkari nagusia, kasu) sindikatu horiek bat egitea espero dutela adierazi dute.